Troilus and Criseyde: Book V

Aprochen gan the fatal destinee That Ioves hath in disposicioun, And to yow, angry Parcas, sustren three, Committeth, to don execucioun; For which Criseyde moste out of the toun, And Troilus shal dwelle forth in pyne Til Lachesis his threed no lenger twyne. -- The golden-tressed Phebus heighe on-lofte Thryes hadde alle with his bemes shene The snowes molte, and Zephirus as ofte Y-brought ayein the tendre leves grene, Sin that the sone of Ecuba the quene Bigan to love hir first, for whom his sorwe Was al, that she departe sholde a-morwe.…